SERIKALI KUJENGA DARAJA LA NHOHOBOLA

Tarehe Iliyowekwa: May 14th, 2018

Waziri Ofisi ya Rais Tawala za Mikoa na Serikali za Mitaa(TAMISEMI) Suleman Jaffo amesema serikali ipo tayari kujenga daraja la mto Nhobola lilipo katika kata ya Mbogwe  Halmashauri ya Mji wa Nzega ili kuondoa adha inayowakabili wananchi wa kata hiyo wakati wa kuvuka hasa nyakati za mvua  kutokana mafuriko.

Jaffo ametoa kauli hiyo leo wakati akiongea na wananchi wa kata hiyo akiwa katika ziara ya kikazi  katika Halmashauri ya Mji Nzega ambapo ametembelea eneo  litakolojengwa daraja hilo ili kujiridhisha na tadhimini aliyokabidhiwa na wataalamu juu ya  ujenzi wa daraja hilo.

"Lengo kubwa  la mimi kufika katika eneo hili ni kuona na kijiridhisha juu ya eneo litakapojengwa daraja ikiwa ni sehemu ya utekelezaji wa ahadi ya Rais John Magufuli  wakati wa kampeni za uchaguzi Mkuu mwaka 2015 kwasababu mvua zikinyesha hapa watu wanashindwa kuvuka kutokana na mto kufurika  na mbunge wenu amekuwa akinieleza kuhusu daraja hili na ndio maana leo nimeamua kuja kuona daraja lenyewe”.Alisema Jaffo.

Alieleza kuwa  Wizara yake imetenga jumla  Tshs bilioni 273 kwaajili  ya ujenzi wa miundombinu ya barabara  na katika fedha hizo ujenzi wa daraja la Nhobola lipo
ambapo amewataka wananchi wa Tabora  kuacha tabia ya kuhujumu miundombinu ya barabara hasa madaraja kwa kufungua vyuma.

"Mkoa wa Tabora  umekuwa na matukio mengi ya kuhujumu miundombinu hasa kufungua vyuma kwenye kingo za barabara na madaraja. Niwatake wananchi wa eneo hili kuwa walinzi katika kulinda miundombinu ya daraja  pindi litakapojengwa kwani pamoja na kuomba kuwekewa taa haitakuwa mwarobaini wa wizi kama wenyewe hamtakuwa  wailinzi" Alisisitiza waziri huyo.

Awali  akiwa katika ofisi ya Mkuu wa Wilaya  Nzeg Mh; Jaffo alimkaribisha Katibu Tawala wa Mkoa wa Tabora ambaye aliteuliwa na Mhe.Rais hivi karibuni pia amewataka Wakurugenzi kuhakikisha kwamba hoja zote zilizoibuliwa na Mkaguzi Mkuu wa Hesabu za Serikali  zinapatiwa majibu kwa wakati.